 |
| ជនជាតិ គ្រឹង ប្រមាណ១០០នាក់តវ៉ាមុខសាលាខេត្ត នៅព្រឹកថ្ងៃចន្ទនេះ។ រូបថត អាដហុក |
រតនគិរីៈ ជនជាតិដើមភាគតិច គ្រឹង ប្រមាណជា ១០០ នាក់ បាននឹងកំពុងធ្វើការតវ៉ានៅមុខតុលាការខេត្តរតនគិរីចាប់តាំងពីព្រឹកថ្ងៃចន្ទនេះមក ដើម្បីទាមទារឲ្យតុលាការដោះលែងតំណាងរបស់ពួកគាត់ឈ្មោះ ហាំង នឿអាយុ ៥០ ឆ្នាំ ដែលត្រូវបានចាប់ខ្លួនដាក់ពន្ធនាគារ ពាក់ព័ន្ធទៅនឹងករណីដុតឈើសង់ផ្ទះរបស់ថៅកែស្រីលី សុខងីម កាលពីសប្តាហ៍មុន នៅនឹងដីសហគមន៍ជាដីទំនាស់ក្នុងស្រុកអូរជុំ។
ចៅក្រមនៃសាលាដំបូងខេត្តរតនគិរី បានសម្រេចឃុំខ្លួនតំណាងសហគមន៍ឈ្មោះ ហាំង នឿ អាយុ ៥០ឆ្នាំ កាលពីថ្ងៃសៅរ៍ បន្ទាប់ពីថៅកែស្រី លី សុខងីម បានដាក់ពាក្យប្តឹងគាត់ពីរឿងដុតឈើសង់ផ្ទះ ក្នុងដីសហគមន៍ ក្នុងភូមិ ម៉ាស់ ឃុំ តងក្រពូល ស្រុក អូរជុំ កាលពីសប្តាហ៍មុន។
បើតាមលោក ឆាយ ធី អ្នកសម្របសម្រួលអង្គការ អាដហុក ខេត្ត រតនគិរី បានប្រាប់ ភ្នំពេញ ប៉ុស្តិ៍ កាលពីម្សិលមិញថា កាលពីឆ្នាំ ២០១៣ កន្លងទៅលោកស្រី លី សុខងីម បានដឹកឈើនិងសម្ភារសំណង់យកទៅដាក់ក្នុងដីសហគមន៍ ដើម្បីសង់ផ្ទះ ប៉ុន្តែ ត្រូវសហគមន៍ធ្វើការតវ៉ាមិនឲ្យសាងសង់ ហើយឈើនិងសម្ភារទាំងនោះ ត្រូវបានទុកនៅទីនោះរហូតមក។ លើសពីនោះចាប់តាំងពីថ្ងៃ ទី៨ដល់ថ្ងៃ ១៣ ខែ មីនា នេះកម្មករ របស់អ្នកស្រី លី សុខងីម បានទៅកាប់ឆ្ការព្រៃសហគមន៍ដោយសំអាងថា ដីក្នុងតំបន់នោះត្រូវតុលាការកាត់មកឲ្យលោកស្រីជាអ្នកគ្រប់ គ្រង។ ខណៈនោះលោក ហាំង នឿ និងប្រជាសហគមន៍ប្រមាណជា ៤០ នាក់បានព្យាយាមឃាត់ក្រុមកម្មករកុំឲ្យកាប់រានយកដីចម្ការ និងដីព្រៃបម្រុងទុករបស់សហគមន៍បន្តទៀត ប៉ុន្តែ ពួកគេមិនស្តាប់ឡើយ។
